Ikigo cy’imisoro cyadohoreye abarenga ibihumbi 50 bari bafite ibirarane

Ikigo cy’Igihugu cy’Imisoro n’Amahoro cyadohoreye abasora barenga ibihumbi 50 bari bafite ibirarane by’imisoro bakuriweho amande y’ubukererwe.

Ibi byagarutsweho kuwa 24 Werurwe 2024 na Komiseri Mukuru w’ikigo cy’Imisoro n’Amahoro (RRA), Pascal Bizimana, aho yavuze ko abafite imisoro batamenyekanishije kuva muri Werurwe 2022 nibayimenyekanisha ku bushake nta mande bazacibwa.

Komiseri Mukuru wa RRA yavuze ko iki cyemezo bafashe kireba abacuruzi bagera ku bihumbi 50.
Aganira na RRA yagize ati “Hari abarenga ibihumbi 50 by’abantu bafite imyenda y’imisoro ariko yabaye myinshi kubera ibihano n’inyungu z’ubukererwe. Abo bantu gukora ubucuruzi birimo kubagora kuko barahangayitse. Abantu bashobora kuba nta musoro bishyuye, hashobora kujyaho gahunda yo kuvanirwaho ibihano mu gihe bimenyekanishije ku bushake. Buriya abantu benshi batinya kumva bagwa mu bibazo byo kudasora ku gihe, bigatuma batimenyekanisha n’uwo musoro ntibawuzane.”

Yatangaje kandi ko iri tegeko riteganya ko umuntu wese umenyekanisha umusoro w’ikirarane ku bushake akurirwaho ibihano cyangwa amande, bityo ko nta bwoba abasora bagomba kugira. Ni mugihe uwamenyekanishije umusoro we mu kwezi kwa Mbere akishyura 50% by’ayo agomba kwishyura azajya ahabwa amahirwe yo kuba yakwishyura amafaranga asigaye mu byiciro birenze bitanu.

Ikigo cy’Igihugu cy’Imisoro n’Amahoro kivuga ko impamvu z’iki cyemezo zishingiye ku korohereza abagowe no kwishyura ibirarane by’imisoro no kongera umubare w’abasora. Ndetse iki cyemezo kireba imisoro y’ubwoko butandukanye irimo umusoro ku nyungu, umusoro k’umushahara y’abakozi n’indi.

Byitezwe ko muri uyu mwaka w’isoresha wa 2023-2024, Ikigo cy’Imisoro n’Amahoro kizakusanya miliyari 2,637 Frw mu misoro n’amahoro angana na 52.4% by’ingengo y’imari y’igihugu ni ukuvuga angana na miliyari 5,030 Frw.

NIYIKIZA Nichas/INZIRA.RW