Ibikorwa by’ubucuruzi byemerewe gukomeza gukora mu bihe bya ‘Guma mu Rugo’ byatangajwe

Kuva kuri uyu wa gatandatu tariki ya 17 Nyakanga 2021, umujyi wa Kigali n’utundi turere 8 biri muri gahunda ya Guma mu rugo, aho gahunda n’ibikorwa byose bifunze uretse serivise nke z’ubucuruzi.

Muri serivise nke zemerewe gukomeza gukora harimo inganda, serivisi n’ibikorwa by’ubucuruzi by’ingenzi, ariko nabyo birasabwa gukora byubahiriza amabwiriza yihariye yabishyiriweho.

Nk’uko byatangajwe n’Inama y’Abaminisitiri yo ku wa 14 Nyakanga 2021 bigashimangirwa n’itangazo rya Minisiteri y’ubucuruzi n’inganga (MINICOM) ryayikurikiye, mu duce twashyizwe muri Guma mu rugo serivisi z’ingenzi mu rwego rw’ubucuruzi harimo amasoko y’ibiribwa, ubucuruzi bw’inyama, amata n’ibiyakomokaho.

Mu bikorwa bizakomeza gukora kandi harimo ubucuruzi bwifashisha ikoranabuhanga, abakora imirimo yo kugemura ibicuruzwa, serivisi za ngombwa zitangwa na banki n’ibigo by’imari, serivisi z’ubwishingizi, serivisi zo kohererezanya amafaranga kuri telephone, n’ibindi.

Kuri ibyo hiyongeraho serivise zo gutwara ibishingwe na serivisi z’isuku za ngombwa, serivisi za gasutamo, imisoro n’amahoro, ubucuruzi bw’ibikomoka kuri peteroli na gaze ndetse na serivisi z’itumanaho.

N’ubwo abacuruza izo serivise bahawe uburenganzira bwo gukora ariko hari ibyo basabwe kubahiriza birimo ko abakozi batagomba kurenga 30%, kandi bagafunga saa kumi n’imwe z’umugoroba.

Abacururiza mu masoko rusange basabwe kuzajya basimburana hakurikijwe gahunda yashyizweho n’abayobozi b’ayo masoko.

Minicom ivuga kandi ko ikindi gisabwa abacuruzi ari ukutazamura ibiciro bishingikirije ibi bihe bya guma mu rugo.

Minicom yatangaje ko inganda zemerewe gukora ari izitunganya umusaruro ukomoka ku buhinzi, ni ukuvuga ibiribwa n’ibinyobwa ndetse n’izikora ibikoresho by’ isuku, isukura n’ubwubatsi

Kuri izo nganda hiyongeraho izikora udupfukamunwa n’ibindi bikoresho byo kwa muganga, n’inganda zikora ibyo gupfunyikamo.

Inganda zizahabwa uburenganzira bwo gukomeza gukora mu byo zisabwa kandi harimo gupimisha abakozi bazo Covid19, babifashijwemo n’Ikigo Gishinzwe Ubuzima, RBC.