Iburasirazuba: Ihene 940 zorojwe imiryango itishoboye

Imiryango 470 yo mu turere twa Rwamagana, Kayonza na Ngoma yahawe ihene 940 na Croix-Rouge y’u Rwanda, mu rwego rwo kubafasha kwikura mu bukene.

Kuwa 29 Werurwe 2024 nibwo aba batishoboye bashyikirijwe izi hene, Umuyobozi ushinzwe itumanaho no gutsura umubano muri Croix rouge y’u Rwanda, Mazimpaka Emmanuel, yavuze ko imiryango yahawe amatungo yatoranyijwe ku bufatanye n’inzego z’ibanze, hagendewe ku baturage bafite ubukene kurusha abandi.

Ati “Abaturage imibereho bafite ubu ngubu leta n’abafatanyabikorwa dufatanya kugira ngo kugira ngo irusheho kuba myiza, ni muri urwo rwego twatanze ihene ebyiri kuri buri muturage.”

Yakomeje avuga ko abo baturage bahisemo kubaha ihene ebyiri ku muryango umwe zifite agaciro k’ibihumbi ijana.

Bamwe mu baturage borojwe bahamya ko imibereho yabo igiye guhinduka mu buryo bufatika, nyuma y’uko yo gutekerezwaho.

Umwe ati “Mu rwego rwo kwikura mu bukene baduhaye aho duhinga twasaruye imyaka duhagaze neza ubu twabashije no kwizigama mu ma banki, ndetse tuzabona ifumbire, tuzabona  n’amafaranga yo kugura mituweli.”

Undi ati “Ubu tugiye gufata neza aya matungo kugira ngo tuzoroze bagenzi bacu babayeho mu buzima bubi.”

Umunyamabanga Nshingwabikorwa w’agateganyo w’Umurenge wa Ruramira, Nsekarije Frederick, yasabye abahawe amatungo kuzayafata neza akabateza imbere, bakirinda kuyiraramo bayagurisha.

Ati“Amatungo yatanzwe ni menshi tugiye gukaza umutekano kugira ngo barusahurira munduru batazayiba”.

Ihene zahawe aba baturage n’ibiraro zubakiwe byatwaye miliyoni zigera kuri 40 Frw, abazihawe basabwe kuzitaho, bibutswa ko bagomba kuzoroza bagenzi babo.

INZIRA.RW