Abanyarwanda bakomeje guterwa impungenge n’itumbagira ry’ibiciro ku masoko, aho mu kwezi kwa Gicurasi 2025 byiyongereyeho 6.9%.
Kuri uyu wa Kabiri tariki ya 10 Kamena 2025, nibwo Ikigo cy’Igihugu cy’Ibarurishamibare mu Rwanda (NISR) cyatangaje ko ibiciro ku masoko byazamutseho 6.9% muri Gicurasi 2025, bivuye kuri 6.3 % byariho muri Mata uyu mwaka.
Ikigo cy’Igihugu cy’Ibarurishamibare mu Rwanda, NISR cyagaragaje ko izamuka ry’ibiciro rishingiye ahanini ku mpinduka zabaye ku biciro by’ibikomoka ku buhinzi, ibinyobwa bisembuye n’ibidasembuye, ubwikorezi, amahoteli, resitora n’ibindi.
NISR yagaragaje ko muri Gicurasi 2025, ibiciro by’ibiribwa n’ibinyobwa bidasembuye byiyongereye ku kigero cya 9.2% mu gihe cy’umwaka, mu gihe byiyongereyeho 0.5% muri Gicurasi 2025 ugereranyije n’ukwezi kwabanje.
Inzu, amazi, amashanyarazi, gaze n’ibindi bicanwa byiyongeraho 3.3%, naho mu gihe cy’ukwezi byiyongeraho 0.7%, ubwikorezi bwiyongereyeho 3.7% muri uyu mwaka. Ni mu gihe muri Gicurasi ugereranyije na Mata bwazamutseho 0.4 %, amaresitora n’amahoteli yiyongeraho 16.6% mu gihe cy’umwaka wose, agira izamuka rya 1.7 % muri Gicurasi ugereranyije na Mata.
Ikigo cy’Igihugu cy’Ibarurishamibare mu Rwanda, NISR kigaragaza ko ibicuruzwa by’imbere mu gihugu byiyongereyeho 6.9%, naho mu gihe cy’ukwezi byiyongeraho 0.1%, ibyatumijwe mu mahanga byiyongeraho 6.9% umwaka wose bikaba byarazamutseho 2% muri Gicurasi.
Ibikomoka ku buhinzi byiyongereyeho 12.3% ariko bigabanyukaho 1.4% muri Gicurasi, mu gihe ibiciro by’ingufu byagabanyutseho 0.8% muri uyu mwaka ariko byiyongeraho 1.9% muri Gicurasi ugereranyije na Mata.
INZIRA.RW
