Muri gahunda yo guteza imbere ba rwiyemezamirimo b’indashyikirwa mu guhanga udushya, yiswe ‘BK Urumuri’, Banki ya Kigali yatangaje ko ku bufatanye na Inkomoko bamaze gutoranya imishinga 25 igomba guhabwa inguzanyo nta nyungu.
Kuri iyi nshuro ya gatatu ya BK Urumuri, imishinga 174 niyo yari yandikishijwe mu irushanwa, ariko nyuma y’igikorwa cyo gutoranyamo iy’indashyikirwa cyabaye kuwa 10 Kamena 2021, hatsinze 25.
Ba nyiri iyo mishinga yatsinze biteganyijwe ko bazahabwa amahugurwa y’amezi atandatu, ubujyanama ku iterambere ry’imishinga yabo ndetse n’inguzanyo itagira inyungu.
Umuyobozi wa Banki ya Kigali, Dr Diane Karusisi, yasobanuye ko kuri iyi nshuro bahisemo bahisemo imishinga ijyanye no guhanga udushya, kuko ari imwe mu nkingi zikomeye mu kuzahura ubukungu bwazahajwe na COVID-19.
Yakomeje agira ati “Ubufatanye bwacu na Inkomoko burakomeje muri uyu mwaka. Tuzibanda cyane ku gufasha ubucuruzi kwivana mu ngaruka za COVID-19. Turashishikariza ba rwiyemezamirimo kubyaza umusaruro amahirwe yose yabashyizwe imbere, nk’aya gahunda ya BK Urumuri.”
Umuyobozi wa Inkomoko, Teta Ndejuru, yishimiye ubufatanye bwabo na BK mu kuzamura imishinga y’indashyikirwa mu guhanga udushya.
Ati “Tunejejwe no gukomeza ubufatanye na Banki ya Kigali bugamije gutera inkunga imishinga yo guhanga udushya, ibi bikazatuma ubukungu bw’u Rwanda buzamuka mu buryo bwihuse binyuze mu bigo bito.”
Imishinga 25 yatoranyijwe na BK Urumuri:
- Hense Ltd,
- T-Kay Investment Ltd
- AM Coffee & Hibiscus Plantation Ltd
- Crop Tech Ltd
- La Fromagerie Rwanda
- Rwagasabo Beverages Ltd
- Uwera Fashion Ltd
- Best Potters Rwanda Ltd
- Indashyikirwa Mubugeni Ltd
- House of Cakes Ltd
- Green Pack Ltd
- Ryabega Integrated Center
- Didy Designs Cow Horns Ltd
- Gusa Ltd
- Ikirere Fashion Arts
- Byose ni Bamboo
- Umunezero W’Ubuzima Bwiza Ltd
- Chemclean Company Ltd
- Talia Ltd
- Yarn Ltd
- PTN Ltd
- KGL Flour Ltd
- Mouzah Designs ltd
- East African Foods & Beverages Ltd
- Exemple Needs Ltd
