Rwanda: Imihanda yubatswe yaruhuye abahinzi n’aborozi bagorwaga no kugeza umusaruro ku isoko

Abahinzi n’aborozi hirya no hino mu gihugu baremeza ko ibikorwaremezo by’imihanda yubatswe cyane cyane imihahirano (Feeder roads) byabaruhuye umutwaro n’ibihombo baterwaga no kubura uko bageza umusaruro ku isoko.

Mu myaka 30 ishize, ibikorwaremezo by’imihanda ni kimwe mu bibazo byari bihangayikishije, aho uretse imihanda mike yahuzaga intara z’igihugu, ahandi hose byari bigoye kubona umuhanda ukoze neza.

Ibi ni bimwe mu byagoraga cyane cyane abahinzi mu kugeza umusaruro w’ubuhinzi n’ubworozi ku isoko nk’amata y’aborozi mu nzuri zitandukanye.

Mu kiganiro  na INZIRA, Hakizimana Innocent w’imyaka 39 utuye mu Kagari ka Cyanya, Umurenge wa Cyuve mu Karere ka Musanze, usanzwe ukora ubucuruzi bw’imyaka akaba n’umuhinzi avuga ko kutagira ibikorwaremezo by’imihanda byabateraga ibihombo ku bwo kubura uko bageza umusaruro ku isoko.

Yagize ati “Ubu iyo nejeje umusaruro  uri butwarwe  ni modokari nta mpungenge mba mfite kuko irahagera kubera hari umuhanda nubwo atari kaburimbo,  nkagurisha umusaruro ubundi nkikenura  mu byo nkeneye.”

Hakizimana Innocent  yongeraho ko asigaye yorohewe no gutunga umuryango we, ndetse atangira mituweli ku gihe bitewe n’ibikorwaremezo by’umuhanda bimufasha  gukora neza akazi ke.

Minisitiri w’intebe, Dr. Edouard Ngirante aherutse gutangaza ko mu myaka isaga itatu gusa, Guverinoma y’u Rwanda yashyize imbaraga mu gutunganya  imihanda y’imigenderano nk’uko bisobanurwa.

Yagize ati  “Dukomeje gufasha abahinzi n’aborozi kugeza umusaruro wabo ku isoko hirya no hino mu gihugu,  imihanda mishya y’imihahirano  ikomeje kwiyongera  kuko yavuye  ku bilometero  2500 muri 2019  ubu ikaba igeze  ku bilometero 3700.”

Ni ukuga ko mu myaka 3 ishize  hubatswe imihanda y’imigenderano izwi nka (Feeder road) isaga ibihumbi 3000 hirya no hino mu gihugu.

TUYISHIME Olive/INZIRA.RW