Umusaruro w’inganda z’u Rwanda wazamutseho 10.3% mu Ugushyingo 2025 ugereranyije n’impuzandengo wariho mu kwezi nk’uko umwaka wa 2024.
Nk’uko bigaragazwa n’imibare y’Ikigo cy’Igihugu cy’Ibarurishamibare, urwego rw’inganda mu gihugu rwazamutseho 10,3% mu Ugushyingo 2025 ugereranyije n’ukwezi nk’uko mu mwaka wari wabanje mu gihe igipimo rusange cy’uburyo rwagiye ruzamuka cyari kuri 6,3% ku mwaka.
Ubucukuzi bw’amabuye y’agaciro bwazamutseho 4,1%, gutunganya ibintu mu nganda byazamutseho 4,9%, amashanyarazi azamukaho 14,1% my gihe ibijyanye n’amazi n’isukura byazamutseho 6,6%.
Ku bijyanye n’ibitunganyirizwa mu nganda byazamutseho 4,9%, iri zamuka ryatewe ahanini n’izamuka ryo gutunganya ibinyobwa hamwe n’itabi byazamutseho 1,8% mu gihe ibijyanye no gutunganya ibikoresho birimo ibya plastique byazamutse kuri 2,6%.
Gutunganya ibitambaro, impu n’ibindi byagabanutseho 7,5% mu gihe gutunganya imbaho n’impapuro hamwe n’ibijyanye n’icapiro byagabanyutseho 6,0%.
U Rwanda rushyize ingufu mu iterambere ry’ubukungu bwarwo, aho leta ifite gahunda yo kwagura ibyanya byahariwe inganda biri hirya no hino mu gihugu ku buryo bitanga umusaruro ufatika, bikanahanga imirimo myinshi.
Nk’icyanya cy’inganda cya Rwamagana biteganyijwe ko cyizongerwaho hegitari 100 ku butaka bwari busanzwe, aho cyari kigizwe n’ubuso bungana na hegitari 80, gifite ubushobozi bwo kubakwamo inganda 51 n’izindi serivisi zunganira inganda zirimo nka sitasiyo ya Lisansi, amabanki, inzu zagenewe ububiko bw’ibintu n’ibindi bakenera bisaga 30.
Ubu kigomba kwagurwa kikagira hegitari 180.
Mu cyanya cy’inganda cya Rwamagana nina ho hagiye kubakwa uruganda rukora imyenda rwa UTEXRWA nyuma y’uko aho rwakoreraga mu Mujyi wa Kigali hasenywe kuko ari mu gishanga.
Mu Karere ka Musanze ho hubatswe uruganda ruzakora ibyuma n’iby’ibanze bikenerwa mu gukora ibyuma ruzajya rukora toni ibihumbi 300 ku mwaka, kandi rugafasha n’izindi nganda kubona ibikoresho by’ibanze zikeneye.
Hari gahunda yo gushyiraho ikigega kizashyirwamo miliyari 500 Frw azashyigikira abikorera hagamijwe guteza imbere ibikomoka mu nganda byoherezwa hanze ndetse no guteza imbere ubucukuzi bw’amabuye y’agaciro.
Leta ifite kandi intego yo gushyira ingufu mu guteza imbere inganda zitunganya imbaho nziza zishobora kugurishwa mu Rwanda no hanze y’igihugu, no gushyiraho icyanya gitunganya impu i Bugesera, kizafasha kongera umubare w’amafaranga igihugu cyinjiza, kuko kizajya cyinjiza miliyoni 430$ buri mwaka.
Urwego rw’inganda zitunganya ibikomoka ku buhinzi n’ubworozi ni rwo rubarizwamo inganda nyinshi, kuko harimo inganda nini 85 n’into 908, mu gihe inganda zikora ibikoresho bitandukanye nini ari 91, inganda nto zikaba 398, inganda zikora ibikoresho by’ubwubatsi nini ni 38, mu gihe into ari 82.
INEZA Marianne/INZIRA.RW
