Ikigo cy’Igihugu cy’Ibarurishamibare (NISR) cyatangaje ko umusaruro w’ibirayi mu bihembwe by’ihinga bya 2025 wiyongereyeho 17% ugereranyije n’ibihembwe byose bya 2024.
Iyi raporo igaragaza uko umusaruro wari wifashe mu 2025, igaragaza ko abahinze ibirayi mu bihembwe by’ihinga byose bya 2025 bejeje neza. Mu gihembwe cya A umusaruro wageze kuri toni ibihumbi 475,7, naho muri B ugera kuri toni ibihumbi 314 mu gihe mu gihembwe cy’ihinga C habonetse umusaruro ungana na toni ibihumbi 94,8.
Imibare igaragaza ko umusaruro w’ibirayi wiyongereyeho 17% mu bihembwe byose bya 2025, ugereranyije na 2024.
Nubwo abahinze ibirayi bamwenyuye, umusaruro w’ibishyimbo waragabanutse kuko wageze kuri toni ibihumbi 230,4 mu gihembwe cy’ihinga cya A bigaragaza igabanyuka rya 1,2% ugereranyije n’igihembwe nk’iki cy’umwaka wari wabanje, naho mu cya B heze ibishyimbo bingana na toni ibihumbi 240,7, bigaragza igabanyuka rya 0,6% ugereranyije n’igihembwe nk’icyo mu 2024.
Mu gihembwe cy’ihinga 2025 C, ubuhinzi bukorwa mu mpeshyi, ibishyimbo byezemo ni toni 3.178, bigaragaza izamuka rya 4% ugereranyije n’igihembwe nk’icyo mu mwaka wari wabanje.
Umusaruro w’ibijumba na wo uri mu byagabanyutse mu 2025. Mu gihembwe cya A wari toni ibihumbi 656, mu gihembwe cy’ihinga B ugera kuri toni ibihumbi 652, mu gihe muri C heze ibijumba bingana na toni ibihumbi 41,2.
Umusaruro w’ibigori na wo waragabanyutse, kuko wageze kuri toni ibihumbi 481,2 mu gihembwe cya A bigaragaza igabanyuka rya 5,3% ugereranyije n’igihembwe nk’icyo mu 2024, na ho mu cya B uba toni ibihumbi 117, na bwo ugabanyukaho 1,2% ugereranyije n’igihembwe nk’icyo mu mwaka wari wabanje.
Umusaruro w’urutoki mu 2025 wazamutseho 1,3%, kuko mu gihembwe cy’ihinga cya A hasaruwe toni 1,2, mu gihembwe cya B haboneka toni miliyoni 1,1.
Umuceri wo wageze kuri toni ibihumbi 69,6 mu gihembwe cy’ihinga cya A, mu cya B hera toni ibihumbi 72,9, bingana n’izamuka rya 0,8% na 0,2% mu bihembwe byombi.
Mu Rwanda kugeza ubu ubuhinzi bukorwa n’abanyarwanda 69%.
INEZA Marianne/INZIRA.RW
