Inyubako izwi cyane ku Kimihurura mu karere ka Gasabo ya Kigali Heights yaguzwe na kompanyi ya YYUSSA amafaranga y’u Rwanda agera kuri miliyari 43.8 Frw.
Amakuru yagiye ahagaragara ku mugoroba wo kuri uyu wa Mbere tariki 14 Ukwakira 2024, aravuga ko iyi nyubako y’ubucuruzi ya Kigali Heights yamaze kugurishwa.
Ikigo gitanga serivise zijyanye no guteza imbere ishoramari n’ubukerarugendo cya YYUSSA, nicyo cyegukanye iyi nyubako ya Kigali Heights, aho iyi nyubako yaguzwe arenga miliyoni 31$ z’amadorali ni ukuvuga arenga miliyari 43.8 Frw.
Perezida w’u Rwanda Paul Kagame, ku itariki ya 5 Ukuboza 2016 nibwo yatashye ku mugaragaro inyubako ya Kigali Heights yari yuzuye itwaye akayabo ka miliyari 30 z’amafaranga y’u Rwanda.
Iyi nyubako iherereye Kimihurura mu Mujyi wa Kigali, iruhande rwa ‘Rond Point’ y’ahazwi nka KBC, aho iteganye neza n’inyubako ya Kigali Convention Center.
Yubatse ku butaka bwa m2 12 750, ikagira ibiro bishobora kwakira abantu 1500. Inyubako yose ingana na metero kare 2400, ikagira ubushobozi bwo kwakira imodoka 150 imbere mu nzu n’izindi 150 hanze.
Iyi nyubako ya Kigali Heights bizwi ko yari iy’umushoramari uri mu bakomeye mu Rwanda, Karere Denis cyane ko ariwe ukurikiye Ikigo Kigali Heights Development cyubatse iyi nyubako.
Ku rundi ruhande, iki kigo cya YYUSSA cyaguze Kigali Heights hari hashize iminsi mike nanone kiguze inyubako izwi nka Makuza Peace Plaza yanamaze guhindura izina ikitwa YYUSSA Plaza.
INZIRA.RW
