Minisitiri w’Abakozi ba Leta n’Umurimo, Amb. Christine Nkulikiyinka, yatangaje ko hagati ya 2017 na 2024, mu Rwanda hahanzwe imirimo miliyoni 1,7 harimo irenga miliyoni 1,4 yahangiwe abari mu cyiciro cy’urubyiruko.
Yabigarutseho ku wa 20 Ukwakira 2025 mu kiganiro yagejeje kuri Komisiyo y’Imibereho y’Abaturage n’Uburenganzira bwa Muntu hagenzurwa ibikorwa mu guteza imbere imibereho yabageze muzabukuru.
Yasobanuye ko kugira ngo urubyiruko n’abageze mu zabukuru bagire imibereho myiza bisaba kuba barakoze akazi keza.
Ubushakashatsi ku mibereho rusange y’Ingo mu Rwanda (EICV 7) bugaragaza ko abarenga miliyoni 1,5 bavuye mu bukene na ho ubukene bugabanyukaho 12,4% mu byiciro byose by’abaturage.
Minisitiri Nkulikiyinka ati “Muri gahunda zikenewe kugira ngo abantu bagire imibereho myiza baba bakiri bato cyangwa bamaze kugera mu zabukuru ari uko baba bafite umurimo, no kugira ngo abantu bagire imirimo myiza, na byo bifite aho bihurira.”
Yagaragaje ko hagati ya 2017 na 2024 mu Rwanda hahanzwe imirimo 1.732.770, irimo 85% yahangiwe urubyiruko, bivuze ko abayigiyemo ari urubyiruko.
Imibare y’Ikigo cy’Igihugu cy’Ibarurishamibare, ijyanye n’abakora n’abashomeri mu Rwanda ya Gicurasi 2025, igaragaza ko Abanyarwanda bafite imyaka 16, bemerewe gukora akazi ari miliyoni 8,5, barimo miliyoni 4,5 bafite akazi mu gihe abarenga ibihumbi 710 bari abashomeri.
Abanyarwanda batari ku isoko ry’umurimo bo ni miliyoni 3,2, barimo abanyeshuri n’abageze mu zabukuru.
EICV 7 igaragaza ko abari mu cyiciro cy’ubukene mu Rwanda bageze mu zabukuru, ni ukuvuga abafite imyaka 66 kuzamura ari 21%, abafite imyaka iri hagati 56 na 65 bangana na 24%, abari mu myaka iri hagati ya 46 na 55 bo bangana na 28%.
Senateri Dusingizemungu Jean Pierre yagaragaje ko abashinzwe imicungire y’abakozi baba bagomba gutegura umukozi wenda kujya mu kiruhuko cy’izabukuru hagamijwe kubafasha kuzabaho neza.
Ati “Ikintu cyo guherekeza, ikintu cyo kujya inama, gutegurira abantu kuzajya mu kiruhuko cy’izabukuru ntabwo gikorwa ku buryo buhagije. Abageze mu zabukuru muri rusange hari n’ababa badakeneye cyane amafaranga, ahubwo hari n’ibindi.”
Yatanze urugero rwa kaminuza yizemo ashaka impamyabumenyi y’ikirenga, avuga ko abarimu bageze mu cyiciro cy’izabukuru bakundaga gusubira ku ishuri bakajya mu biro byabo bigatuma ubuzima burushaho kwisunika.
