Dr. Uzziel Ndagijimana wabaye Minisitiri w’Imari n’Igenamigambi, yagizwe Umuyobozi Mukuru wa BK Group Plc asimbuye Beata Habyarimana weguye mu nshingano.
Mu itangazo rigenewe abanyamakuru ryagiye hanze na BK Group Plc kuri uyu wa 13 Kanama 2024, ryemeje ko Dr. Uzziel Ndagijimana ariwe wasimbuye Beata Habyarimana wari umaze imyaka ibiri kuri uyu mwanya.
Iri tangazo rivuga kandi ko Dr. Ndagijimana atangira inshingano ze kuri uyu wa 14 Kanama 2024, nyuma y’icyemezo cy’Inama y’Ubutegetsi y’icyo kigo yateranye kuri uyu wa 13 Kanama 2024.
Umuyobozi w’Inama y’Ubutegetsi ya BK Group Plc, Jean Philippe Prosper, yavuze ko BK Group Plc izungukira mu bunararibonye bwa Dr. Uzziel Ndagijimana.
Ati “Tunejejwe ko kuba twahisemo Dr. Uzziel Ndagijimana nk’Umuyobozi mushya wa BK Group Plc. Imiyoborere ye n’ubumenyi bwe mu bijyanye n’ubukungu n’urwego rw’imari bizadufasha mu gushyira mu bikorwa ingamba za BK Group ndetse n’intego zayo z’ahazaza.”
Bongeyeho ko azakorana bya hafi n’abayobozi b’ibigo bishamikiye kuri BK Group Plc mu rwego rwo guteza imbere icyo kigo.
Dr. Uzziel Ndagijimana akaba mu nshingano afite harimo kuyobora ibigo bitanu biri muri BK Group Plc aribyo Bank of Kigali Plc, BK General Insurance, BK Capital, BK TecHouse na BK Foundation, akaba yasabwe kuzakorana n’abayoboye ibi bigo by’umwihariko.
Inama y’Ubutegetsi ya BK Group Plc ikaba yashimiye Beata Habyarimana wari umaze imyaka ibiri muri izi nshingano.
INZIRA.RW
