BK yatangiye ubufatanye na SLMC buzayifasha kurushaho guha serivise nziza abakiriya

Sangiza abandi

Banki ya Kigali Plc yatangaje ko yinjiye mu bufatanye n’ikigo cy’inzobere mu gutanga ubujyanama mu micungire y’abakozi n’amahugurwa ku nzego zitandukanye kitwa Sheer Logic Management Consultants (SLMC), hagamijwe kurushaho kunoza serivise abakiriya bahabwa.

SLMC isanzwe ifite ubunararibonye mu gutanga ubujyanama mu micungire y’abakozi, gutanga amahugurwa mu nzego zitandukanye yaba abikorera ku giti cyabo ndetse n’inzego za Leta.

Umuyobozi wa BK Plc, Dr. Diane Karusisi yatangaje ko imikoranire n’iki kigo igamije kurushaho kunoza serivise abakiriya bahabwa no guha agaciro abanyamigabane b’iyi banki.

Yagize ati “Icyemezo cyo guha SLMC ububasha bwo gucunga abakozi bari muri serivisi z’ibanze zihabwa abakiliya cyafashwe hakozwe ubushishozi buhagije kandi kijyanye n’imikorere myiza iriho ubu. Ubu bufatanye buzadufasha kurushaho guha serivisi nziza abakiliya bacu no guha agaciro abanyamigabane bacu”.

BK isobanura ko SLMC izahabwa ububasha bwo gucunga abakozi bari muri serivisi z’ibanze zihabwa abakiriya, mu rwego rwo gufasha abakozi gutanga serivisi nziza cyane cyane iz’ikoranabuhanga.

Ikigo SLMC gifite uburambe mu kazi bw’imyaka 20 gitanga ubujyanama mu micungire y’abakozi, gutanga serivisi mu bijyanye no gushakira abakozi ibigo no kubaha amahugurwa muri Afurika y’Iburasirazuba na Afurika yo hagati.

Cyahawe igihembo na Global Brands International nk’ikigo cyahize ibindi mu micungire y’abakozi muri Kenya mu 2019 na 2020.

Umuyobozi wa BK Plc, Dr. Diane Karusisi avuga ko ubufatanye na SLMC buzanoza serivisi zihabwa abakiriya cyane cyane izishingiye ku ikoranabuhanga



TANGA IGITEKEREZO

Imeli yawe ntabwo iribuze kugaragara. Ni ngombwa kuhuzuza *