Urwego rw’Ubugenzuzi Bukuru bw’Imari ya Leta, OAG rwatangaje ko mu mwaka w’ingengo y’imari wa 2022-2023 miliyari zisaga 2.5 Frw zakoreshejwe nabi.
Ibi byagarutsweho kuri uyu wa Gatatu, tariki 24 Mata 2024, ubwo Umugenzuzi Mukuru w’Imari ya Leta yagezaga ku nteko rusange y’Inteko Ishinga Amategeko imitwe yombi, ibikubiye muri raporo y’uru rwego ku bugenzuzi ku mikoreshereze y’imari n’umutungo bya leta mu mwaka wa 2022-2023.
Urwego rw’Ubugenzuzi Bukuru bw’Imari ya Leta rwatangaje ko mu mwaka w’ingengo y’imari warangiye ku wa 30 Kamena 2023, miliyari zisaga 2.5 Frw zakoreshejwe mu buryo budakurikije amategeko.
Umugenzuzi Mukuru w’Imari ya Leta, Alexis Kamuhire yavuze ko aya mafaranga ya leta yakoreshejwe bitari ngombwa, andi akoreshwa mu buryo budakurikije amategeko.
Umugenzuzi Mukuru, Alexis Kamuhire yanagaragaje ko muri izi miliyari 2.5 Frw yacunzwe nabi kubera ko harimo amafaranga yanyerejwe n’andi yakoreshejwe nabi bitewe n’isesagura ry’umutungo rusange.
Mu gihe mu mwaka w’ingengo y’imari warangiye ku wa 30 Kamena 2023, umugenzuzi mukuru yagaragaje ko miliyari 2.5 Frw zakoreshejwe nabi na bimwe mu bigo bya leta, bigaragara ko amafaranga yakoreshejwe nabi yagabanutse kuko mu mwaka w’ingengo y’imari wari wabanje ayakoreshejwe nabi yari miliyari 6.4 Frw.
INZIRA.RW
