Rwanda: Umusaruro w’amabuye y’agaciro wikubye kane ugera kuri miliyari 1.1$ z’amadorali

Ubucukuzi bw’amabuye y’agaciro  bwinjirije u Rwanda arenga miliyari na miliyoni ijana z’Amadorali (1.1$)  mu 2023, avuye kuri miliyoni 374$  mu 2017. 

Imibare y’Ikigo cy’Igihugu gishinzwe Mine, Peterole na Gaz (RMB) igaragaza ko muri gahunda ya Guverinoma y’imyaka irindwi NST-1 habayeho iterambere ry’ubucukuzi bw’amabuye y’agaciro kuko umusaruro wikubye hafi inshuro enye.

Umuyobozi w’Ishami rishinzwe iyubahirizwa ry’amategeko n’ubugenzuzi bwa  Mine mu kigo RMB, Dushimimana Narcise, agaragaza ko kuva mu 2017 kugeza mu 2023 habayeho izamuka ry’umusaruro w’amabuye y’agaciro aho wikubye kane.

Yagize ati “Iyo urebye aho tuvuye, 2017 twari dufite miliyoni 374 z’Amadorali, uyu mwaka turangije 2023 warangiye turi kuri miliyari imwe na miliyoni ijana zirenga z’amadorali (1.1$). Hari byinshi byakozwe kugirango ayo mafaranga abe agezaho.”

Dushimimana Narcise avuga ko uyu musaruro uturuka mumbaraga zashyizwe mu ruhererekane rw’ibikorwa bikorwa mu bucukuzi bw’amabuye y’agaciro harimo ubushakashatsi, ubucukuzi, ubucuruzi no kuyongerera agaciro.

Ibi bikaba bigerwaho ku bufatanye n’abikorera na Leta, aho abakora muri uru rwego boroherezwa gukorera ahantu haborohereza kandi hatekanye.

Umuyobozi w’ihuriro  ry’abacukuzi b’Amabuye y’agaciro mu Rwanda, Butera Frank  agaragaza ko  urugendo rw’ubucukuzi bw’amabuye y’agaciro hari intambwe yagezweho by’umwihariko ku gusezerera ubucukuzi bwa gakondo, ndetse no gushyiraho amashuri abyigisha.

Ati “Muri EDPRS haba iya mbere n’iya kabiri  ubucukuzi icyo gihe  navuga ko bwari nk’ubucukuzi bwa gakondo,  bwarimo abantu badafite ibikoresho bihagije, badafite ubushobozi mu buryo bwa mafaranga, ndetse badafite ubumenyi buhagije.”

Akomeza agira ati “Muri NST1 nibwo haje amashuri  yigisha ubucukuzi,  nibwo twatangiye kubona  abanyeshuri basohoka bize iby’ubucukuzi , bigenda byongera ku bumenyi abantu bari  basanzwe bafite mu bucukuzi. Bituma habaho ubushakashatsi butari buhari, noneho ahantu hacukurwa hagenda haboneka , abantu bagenda bongera  ubushoramari mu bikoresho  bikoreshwa, bava mu bikoresho bya gakondo  batangira gukoresha ibikoresho bigezweho.”

Ikigo cy’Igihugu gishinzwe Mine, Peterole na Gaz kigaragaza ko kuva mu 2017 kugeza 2023 hari  amabuye yandi yabonetse harimo Amabengeza   n’andi  yitwaga ibisigazwa  yaje kugira agaciro.

Urugero ni amabuye yitwa lithium  yafatwaga nk’ibisigazwa yaje kugira agaciro cyane cyane nyuma ya covid 19, aho haziye imodoka zikoresha  umuriro wa mashanyarazi, ubu asiga akoreshwa mu nganda zikora amabatiri y’imodoka, aya amabuye y’agaciro ubu arakenewe cyane ku isoko mpuzamahanga kuko avamo na batiri za telephone na mudasobwa.

RMB ivuga ko ari urugendo rutari rworoshye  kugirango  bave ku mliyoni 374 z’amadorali mu 2017,  bagere kuri  miliyari 1.1$  mu mwaka wa 2023.

TUYISHIME Olive/INZIRA.RW