Ikigo cy’Igihugu cy’Imisoro n’Amahoro, RRA cyatangaje ko guhera tariki ya 15 Mata, gasutamo igenzura ibicuruzwa ku cyambu cya Dubai Ports (DP World) iherereye i Masaka izatangira gukora amasaha 24 kuri 24 avuye ku masaha 8.
Ibi bikubiye mu itangazo ry’Ikigo cy’Igihugu cy’Imisoro n’Amahoro kuri uyu wa 9 Mata 2024, ryashyizweho umukono na Komiseri ushinzwe serivise za Gasutamo, Mwumvaneza Felicien.
Muri iri tangaza, RRA yamenyesheje abatumiza ibicuruzwa mu mahanga, abohereza ibicuruzwa mu mahanga, abunganira abacuruzi muri gasutamo, abatwara imizigo igenzurwa na gasutamo ndetse n’abandi bafatanyabikorwa ko guhera kuwa Mbere tariki 15 Mata 2024, ko Gasutamo yo ku cyambu cya Dubai Ports izatangira gukora amasaha 24 ku yandi.
Bati “Guhera kuwa mbere tariki 15 Mata 2024, ibiro bya Gasutamo biherereye i Masaka (DP World) bizatangaira gukora amasaha 24.”
Iyi gasutamo ku cyambu cya Dubai Port ikazajya ikora amasaha 24 ku yandi, ndetse ikorere iminsi irindwi kuri irindwi.
Icyambu cya Dubai Ports “Kigali Logistics Platform” giherereye mu murenge wa Masaka, Akarere ka Kicukiro, aho cyubatse ku bwa metero kare 2,500-3000.
Mu 2019 nibwo icyambu cya Dubai Ports cyafunguwe kumugaragaro na Perezida w’u Rwanda Paul Kagame.
Philbert Inkindi, Ukuriye ubucuruzi kuri Dubai Ports World Rwanda yashimangiye ko kuba gasutamo igiye gukora amasaha 24 ku minsi irindwi (24/7) ari amahirwe yo korohereza abacuruzi gutwara imizigo yabo byoroshye.
Yagize ati “Abatumiza ibintu mu mahanga ubu bagiye kujya babonera ku gihe ibicuruzwa byabo, ndetse na RRA ikusanye ku gihe imisoro. Ibi bizanatuma imizigo twakira yiyongera.”
Icyambu cya Dubai Ports gifite ubushobozi bwo kwakira amakamyo manini 198, ndetse n’icyanya cyashyirwamo kontineri kingana na metero kare ibihumbi 12.
INZIRA.RW