Igihembo cy’ikigo cyiza mu gutanga ubujyanama mu by’imari mu Rwanda cyahawe ‘BK Capital Ltd’

Sangiza abandi

BK Capital Ltd, ikigo cy’imari gishamikiye kuri BK Group plc cyahawe igihembo mpuzamahanga cy’ikigo cyahize ibindi mu gutanga ubujyanama mu by’imari mu Rwanda muri 2021, “Best Corporate Finance Advisory Firm”.

Ni igihembo gitangwa n’ikinyamakuru cyo mu Bwongereza cyitwa CFI (Capital Finance International) cyandika inkuru z’ubukungu, ubucuruzi n’imari ku Isi hose.

Buri mwaka icyo kinyamakuru gitanga ibihembo ku muntu cyangwa ikigo cyagize uruhare rugaragara mu guteza imbere ubukungu muri rusange, no gutanga serivise nziza z’ubujyanama mu by’imari.

Umusanzu ufatika BK Capital Ltd cyatanze mu bujyanama bwo guhanahana amafaranga mu bigo bibiri bikomeye mu Rwanda biri no ku isoko ry’Imari n’Imigabane, Cimerwa Plc muri Kanama 2020 na MTN Rwandacell Plc muri Gicurasi 2021, biri mu by’ibanze byashingiweho hatangwa iki gihembo.

Abateguye ndetse bakanatanga ibyo bihembo kandi bavuze ko mu bindi byatumye BK Capital yegukana igihembo cy’ikigo cyiza mu gutanga ubujyanama mu by’imari mu Rwanda mu 2021 ari uburyo ihanga udushya mu byo ikora ndetse igaha abakiliya serivisi ziri ku rwego rushimishije.

BK Capital Ltd yashimiwe imikorere myiza

Umuyobozi w’iki kigo Umutoni Carine yavuze ko iki gihembo bahawe gishimangira imikorere myiza mu bijyanye na serivise z’ubujyanama mu by’imari.

Yagize ati “Dufite umuhate wo gukomeza kongera imari z’abakiriya bacu, bikazadushyira mu mwanya mwiza w’ikigo cy’ishoramari cyita ku nyungu z’abakiliya, ndetse kikanabaha ibisubizo byiza na serivisi z’ubujyanama zikwiriye.”

BK Group Plc yatangije ku mugaragaro BK Capital Ltd mu 2019, hagamijwe kurushaho kwegera abakiliya bayo, iba ikigo cya kane igize nyuma ya BKTechouse yita ku ikoranabuhanga; BK Insurance yita ku Bwishingizi na BK Plc yita kuri serivisi za banki.

Iki kigo gikora ubushakashatsi mu kigo imbere bw’uko isoko rihagaze, bigafasha abakiliya gufata umwanzuro ukwiriye, kikanatanga ubujyanama mu bijyanye n’imari, mu bikorwa by’ubucuruzi kigatanga serivisi z’ubugenzuzi, iz’ijyanye n’icyatera igihombo mu bucuruzi n’icyo wakora ngo ntikizabeho cyangwa niba cyarabaye bakaguha ubujyanama bw’uko wakivamo, n’izindi.

Iki gihembo kije gikurikira icyo Banki ya Kigali nayo iherutse kwegukana cya banki nziza mu Rwanda, mu bihembo bizwi nka ‘Euromoney Awards for Excellence’ by’umwaka wa 2021.

Yo yagihawe ibikesheje imikorere yayo myiza igamije guhindura imibereho n’iterambere ry’isoko ikoreraho n’uburyo yitwaye muri ibi bihe bya Covid-19.

2 Ibitekerezo

TANGA IGITEKEREZO

Imeli yawe ntabwo iribuze kugaragara. Ni ngombwa kuhuzuza *