Mu myaka 30, Perezida Kagame yifuza u Rwanda rwikubye inshuro eshanu mu iterambere

Perezida w’u Rwanda, Paul Kagame   yavuze ko yifuza kubona  iterambere ry’u Rwanda ry’ikubye  inshuro  eshatu , enye cyangwa eshanu mu myaka 30 iri imbere.

Ibi yabigarutseho kuri uyu wa Mbere tari 8 Mata 2024  mu kiganiro yagiranye n’abanyamakuru  barimo abo mu Rwanda  no mu  mahanga, bitabiriye ibikorwa byo  Kwibuka ku nshuro ya 30 Jenoside yakorewe Abatutsi mu 1994.

Muri iki kiganiro n’abanyamakuru,   PerezidaKagame yabajijwe  uko abona u Rwanda mu myaka 30 iri imbere, avuga ko yifuza kubona iterambere ryikubye inshuro hafi eshanu.

Yasubije agira ati  “Tuzakomeza gutera imbere, tugere aho abandi bari  aho bamwe batanabyitaho. Iyo ubona ibihugu biteye imbere, kuki u Rwanda  cyangwa Afurika  itatera imbere kuri urwo rwego.”

Yakomeje agira ati  “U Rwanda  rwo mu myaka 30 iri imbere  rukwiye kuba nibura rwikubye  inshuro eshatu, enye cyangwa eshanu, rukwiye  kuba rwiza kurusha urwo ubona uyu munsi”.

Paul Kagame  yavuze ko  mu myaka 30 ishize  ruvuye ahabi hari intambwe igaragara imaze guterwa.

Ati “Ndatekereza  ko imyaka 30 iri imbere tuzaba tutavuye mu mva, kuri iyi ncuro tuzaba  tuvuye ku ntambwe  ikomeye tuzaba twarateye.”

Iterambere u Rwanda rumaze kugeraho rishimangirwa nuko nko mu mwaka wa 1994 Umunyarwanda yinjizaga amadolari 146 ku mwaka, na ho muri 2018 yinjizaga amadolari 778. Biteganijwe ko mu mwaka wa 2035 umunyarwanda azaba yinjiza amadolari ibihumbi 4 ku mwaka, mu gihe icyerekezo 2050 azaba yinjiza ibihumbi bisaga 12 by’amadolari ku mwaka, ibi byose urwego rw’imari rubigiramo uruhare runini.

TUYISHIME Olive/INZIRA.RW