Perezida Kagame yashimangiye ko ubumwe bw’abanyarwanda bwabaye imbarutso y’iterambere

Mu  nama mpuzamahanga  ya Global Citizen, igamije kurebera hamwe ingamba za kwifashishwa  mu  kurwanya ubukene bukabije, Perezida w’u Rwanda,  Paul Kagame yashimangiye ko ubumwe n’ubudaheranwa  byabaye inkingi y’iterambere mu Rwanda.

Mu kiganiro yatanze hifashishijwe ikoranabuhanga mu nama mpuzamahanga ya Global citizen, Perezida Kagame  yagaragaje ko mu myaka 30 ishize abanyarwanda bashyize imbere ubumwe n’ubudaheranywa nk’inzira y’iterambere ry’u Rwanda.

Ati “Twahisemo  kuba hamwe   ndetse tunashyira inyungu za buri munyarwanda imbere, ubumwe niryo shoramari ryiza twakoze, twashyize imbere  no kubaka inzego zihamye zishoboye  kuzuriza inshingano abaturage bacu . Kuri twe  kwigira ni izingiro twubakiyeho imibereho yacu ndetse no gutanga serivise inoze ku banyarawanda  bose.”

Yakomeje agira ati  “Kwigira no kumva neza uruhare rwa buri wese  mu gufata inshingano z’ahazaza hacu, nta n’umwe utugenera uko tubaho, tugomba kurwanira  kubaho kwacu  ndetse tugashyira ingufu mu byo dukora .”

Perezida Paul Kagame  yagaragaje ko Jenoside yakorewe Abatutsi mu 1994, ikwiye guha isomo Isi muri rusange, imvugo ntibizongere  ukundi ntibe amasigara cyicaro.

Ati “Ku rwego rw’Isi turi kubona ibikorwa by’urugomo  byinshi, kandi akenshi ibihugu bikomeye ntibigire na kimwe bikora  kandi aribyo bihora byigisha uburenganzira bwa muntu, ibyatubayeho byaba no ku  wundi uwariwe wese,  rero ntitwakirengagiza inshingano zacu mu kugaragaza ko imvugo ntibizongere ukundi ko idakwiye kuba imvugo iri aho gusa.”

Perezida Kagame  yagaragaje  uruhare rwa Move Afrika  nka kimwe mu bikorwa bigamije gukora ubukangurambaga mu gushyigikira  igamba zijyanye no kurwanya ubukene  bukabije,ndetse no kubaka ingamba zitajegejega mu rwego rw’ubuzima .

Ati “ Move Afrika  ni ingenzi ku  bw’impamvu ebyiri ; iya mbere nuko  irimo kubaka abanyamwuga  bitezweho kuzafasha mu ruganda ndangamuco muri Afurika binyuze mu bitaramo cyane ko urwo ruganda rubarirwarwamo ubutunzi bubarirwa mu mamiliyoni ,kandi bigira umusaruro  mwiza ku bukungu bw’umugabane wa Afrika.”

“Icya kabiri   ni uguteza imbere imibereho myiza  cyane ko move Afrika yo muri 2023 yari  igamije kubaka  rwego rw’ubuzima  mu buryo buhamye  hibandwa ku bajyanama bubuzima  cyane ko mu Rwanda  tubaha agaciro gakomeye.”

Iyi nama ya Global Citizen igamije kurebera hamwe ingamba za kwifashishwa mu kurwanya ubukene bukabije, ni inama Perezida Kagame yitabiriye hifashishijwe ikoranabuhanga.

TUYISHIME Olive/INZIRA.RW